去亲眷人家吃喜酒。11点半敲过，厨师傅开始搬点心，冷盆摆子一台子，吃子勿多一歇，热炒上来特，一只接一只，来勿及吃。
“现在日脚好过，铜钿多特，吃喜酒个小菜又好又多，比老早辰光勿晓得要好多噢。”一张台浪个小伯伯话。三妈妈跟子讲：“话勒对个，以前只不过十碗头呀，即歇是两个十碗头勿止勒，呒处比个。”
何叫十碗头？就是10只小菜，老早革歇崇明喜酒台浪通行个。到子八十年代逐点少特，后来子呒得特，年纪轻个是勿识个。
第一盆是酱烩蛋。一只蛋横里对斩，4个半只合扑勒盆子底里，上面合扑拉叠半只，看上去成梅花形，蛮有艺术性个。
第二盆是猪肝。猪肝煠熟子斩成片，一片一片厚薄差勿多，摆勒齐齐崭崭。
第三盆是白斩鸡。鸡是自家养，真碰硬个家户鸡，还是散养个勒。斩成狭长龙龙一块一块装勒盆子里，白里透黄，油亮照照，卖相十足，吃勒嘴里又鲜又嫩，打巴掌勿放。
第四盆是炒肉瓜。革只菜是崇明个传统名菜，肉是真肉丝，瓜是酱瓜丝。酱瓜是自家热子酱腌出来个，味道就是勿一样。炒肉瓜吃勒嘴里肉丝鲜香，酱瓜脆嫩，咸里带点甜。
第五盆是白斩肉。猪肉先暴腌，就是鲜肉稍微腌一腌，煠子斩片，味道像鲜肉又像咸肉。虽算夹真夹肥，但不过勿感到油脂腻腻，鲜笃笃嫩朵朵就是崭。
第六盆是海蜇。海蜇头或海蜇皮子斩丝。
第一碗是鱼。红烧白鱼，用白鱼是有话头个，寓意清白人家，做人清白。
第二碗是红烧肉。叫名一碗，实际浪上面是肉块，下面是黄芽菜或者青菜，一共8块，8个人一桌一人一块，呒得多也呒得少。
第三碗是肉包子。油豆腐嵌个，也有豆腐叶或者黄芽菜叶卷个，一人一只一共8只，孩放勒碗面浪，碗底里是莳菇或者笋干。
第四碗是鸡头鸡脚烧黄芽菜，也有个黄芽菜肉丝线粉汤，放鸡汁个，筷筷鲜。
还有个规矩，十碗头里两只菜是勿好吃脱个。一只是鱼，还一只是蛋，上子年纪个人差勿多孩晓得个。
小喊底一趟跟子姆妈去吃喜酒，勒勒路浪姆妈就叮嘱，喜酒台浪个鱼是勿吃个。我平常落地最喜鱼头爿咂咂，听子革话勿捂心，执结子问为何呒处吃。姆妈面孔板起子：“拗问特，革是老代里传下来个规矩，晓得伐？先脱你讲清爽，勿听个话转去。”
我马上连话“晓得特”。姆妈又话：“还有勒，台浪个酱煨蛋也是勿作吃个，记好子。”我也满口答应，单怕勿领我去吃喜酒。
革是眼眼解放革辰光个事体，也听自家亲婆、宅浪好公好婆讲过，伊特孩是清朝辰光生个，看来胎常是一代一代传下来个老规矩。
革末为何呒处吃呐？
鱼，勒勒官话里和“余”个声音一样，年年有余、吃个着个用个钞票样样有余，革是大吉大利好口彩呀！吃脱仔勿是变仔呒得余特？革爱好个嘞？
爱讲讲勿吃蛋个原因。蛋可以孵小鸡，鸡可以生蛋，有蛋有鸡代代相传，吃喜酒个辰光，女家送到男家个嫁妆里，马桶是总归有个，崇明人好听来叫子孙桶，里边放红蛋，叫子孙蛋。故所以革盆子酱煨蛋要留勒台浪，望新人新小官早生贵子，祝革家人家人丁兴旺子孙满堂。
作者 陆茂清
